Зульбекс 20 мг №14 табл

Сипаттама

Дәрілік затты медициналық қолдану

жөніндегі нұсқаулық

Зульбекс^®

Саудалық атауы

Зульбекс^®

Халықаралық патенттелмеген атауы

Рабепразол

Дәрілік түрі

Ішекте еритін қабықпен қапталған таблеткалар, 10 мг және 20 мг

Құрамы

Бір таблетканың құрамында

белсенді зат -10,0 мг(9,420 мг рабепразолға баламалы) немесе 20,0 мг (рабепразолға баламалы 18,850 мг) натрий рабепразолы

қосымша заттар: маннитол, жеңіл магний оксиді, гидроксипропилцеллюлоза, орынбасу дәрежесі төмен гидроксипропилцеллюлоза (LH-21), орынбасу дәрежесі төмен гидроксипропилцеллюлоза (LH-11), магний стеараты,

қабығы: этилцеллюлоза, жеңіл магний оксиді,

ішекте еритін қабығы: гипромеллоза фталаты, диацетилденген моноглицеридтер, тальк, титанның қостотығы (Е 171), темірдің қызыл тотығы (Е 172) (10 мг доза үшін), темірдің сары тотығы (Е 172) (20 мг доза үшін).

Сипаттамасы

Дөңгелек пішінді, екі беті дөңес, қызғылт-сары түсті үлбірлі қабықпен қапталған, ойығы бар (10 мг доза үшін) таблеткалар.

Дөңгелек пішінді, екі беті дөңес, аздап қоңырлау-сары түсті үлбірлі қабықпен қапталған (20 мг доза үшін) таблеткалар.

Фармакотерапиялық тобы

Қышқылдылықтың бұзылуымен байланысты ауруларды емдеуге арналған препараттар. Ойық жараға қарсы препараттар және гастроэзофагеальді рефлюксті емдеуге арналған препараттар. Протондық сорғы тежегіштері. Рабепрозол

АТХ коды А02ВС04

Фармакологиялық қасиеттері

Фармакокинетикасы

Зульбекс^® ішекте еритін (асқазанда төзімді) қабықпен қапталған натрий рабепразолы таблеткалары түрінде келеді. Бұл формасы рабепразолдың қышқыл ортаға төзімсіздігіне негізделген. Сондықтан рабепразолдың сіңуі ішекте басталады. Тағам да, препаратты қабылдау да натрий рабепразолының сіңуіне әсер етпейді. Тағаммен клиникалық маңызды өзара әрекеттесулері жоқ.

Тез сіңеді; рабепразол плазмадағы ең жоғарғы концентрациясына 20 мг дозасын қабылдағаннан кейін шамамен 3,5 сағаттан соң жетеді. Рабепразолдың плазмадағы ең жоғарғы концентрациялары (C_max) мен «концентрация-уақыт» (AUC) қисық астындағы ауданы 10 мг-ден 40 мг дейінгі дозалар ауқымында дозаға тәуелді сипатта. Пероральді қабылданған 20 мг дозасының абсолюттік биожетімділігі (вена ішіне енгізгенмен салыстырғанда) көбінесе жүйеалды метаболизмінің есебінен, шамамен 52% құрайды.

Плазмадан жартылай шығарылу кезеңі шамамен бір сағатты (0,7-ден 1,5 сағатқа дейін), ал жалпы клиренсі – 283 ± 98 мл/минутты құрайды.

Таралуы

Плазма ақуыздарымен рабепразол шамамен 97% байланысады.

Метаболизмі мен организмнен шығарылуы

Натрий рабепразолы, протондық сорғы тежегіштері класының басқа да өкілдері сияқты, бауырда P450 цитохромының (CYP450) қатысуымен метаболизденеді. Натрий рабепразолы CYP450 изоферменттерімен (CYP2C19 және CYP3A4) метаболизденеді. Рабепразол күтілетін плазмалық концентрацияларында CYP3A4 бәсеңдетпейді және көтермелемейді.

Плазмадан табылатын негізгі метаболиттері тиоэфир (M1) мен карбон қышқылы (M6) болып табылады, ал сульфонды метаболит (M2), десметил-тиоэфир (M4) және меркаптурин қышқылы бар (M5) коньюгат азғантай мөлшерде анықталады. Тек десметилді метаболитінің ғана (M3) азғантай секрецияға қарсы белсенділігі бар, бірақ ол плазмада анықталмайды.

Бір рет 20 мг пероральді қабылдағаннан кейін өзгермеген препарат несепте анықталмайды. Қабылданған дозасының шамамен 90%-ы несеппен екі метаболит: меркаптурин қышқылды коньюгат (M5) пен карбон (M6) түрінде және тағы екі белгісіз метаболит түрінде шығарылады. Енгізілген препараттың қалған бөлігі нәжіспен шығарылады.

Жыныс

Жасы мен дене салмағының өзгеретінін ескере отырып, 20 мг дозадағы рабепразолдың фармакокинетикалық параметрлерінде жыныстық айырмашылықтар анықталған жоқ.

Бүйрек функциясының бұзылуы

Бүйрек жеткіліксіздігінің ақырғы сатысы тұрақты, гемодиализді қажет ететін (креатинин клиренсі £ 5 мл/мин/1,73 м²) рабепразолдың таралуы бүйрегі сау пациенттердегі таралуымен өте ұқсас болды. Мұндай пациенттердегі AUC және C_max дені сау бүйрек кезіндегіден 35% төмен болды. Рабепразолдың жартылай шығарылуының орташа кезеңі бүйрегі сау пациенттерде 0,82 сағатты, гемодиализ аясындағы пациенттерде 0,95 сағатты және гемодиализден кейін – 3,6 сағатты құрайды. Демеуші гемодиализді қажет ететін бүйрегі ауыратын пациенттердегі препараттың клиренсі бүйректері сау пациенттерге қарағанда шамамен екі есе көп болды.

Бауыр функциясының бұзылуы

20 мг рабепразолды бір рет қабылдағанда бауырдың созылмалы жеңіл немесе орташа созылмалы аурулары бар пациенттерде AUC рабепразолдың жартылай шығарылу уақыты 2-3 есе ұлғайды. Алайда 20 мг дозасын 7 күн бойы күн сайын қабылдағаннан кейін AUC тек 1,5 есеге, ал C_max – тек 1,2 есеге артты. Бауыры ауыратын пациенттерде рабепразолдың жартылай шығарылу кезеңі клиникалық салыстырмалы фармакодинамикалық жауап (асқазан pH-ын бақылау) кезінде бауыры сау пациенттердегі 2,1 сағатпен салыстырғанда 12,3 сағатты құрады.

Егде жастағылар

Егде жастағы пациенттерде рабепразолдың организмнен шығарылуы біраз төмендеген. Натрий рабепразолын 7 күн бойы 20 мг тәуліктік дозада қабылдағаннан кейін AUC шамамамен екі есе, ал C_max 60% -ға ұлғайды, t_½ жастармен салыстырғанда 30%-ға ұлғайды. Алайда рабепразолдың жинақталу белгілері анықталған жоқ.

CYP2C19 полиморфизмі

CYP2C19 – метаболизмі баяу пациенттерде рабепразолдың 20 мг пероральді дозасын 7 күн бойы қабылдау AUC метаболизмі белсенді тұлғалардағы сәйкесінше параметрлерден шамамен 1,9 және t½ 1,6 есе жоғарылауына әкеледі, бұл кезде C_max тек шамамен 40%-ға ғана артқан.

Фармакодинамикасы

Зульбекс^® орынбасқан бензимидазолдардың секрецияға қарсы препараттары класына жатады, олар H⁺/K⁺-АТФ-аза ферментін (протондық сорғы) тежеу арқылы асқазан сөлінісін бәсеңдетеді. Препараттың әсері дозасына байланысты болады және көтермелеуші фактордың табиғатына байланыссыз асқазандағы тұз қышқылының базальді және стимуляцияланған сөлінісінің бәсеңдеуіне алып келеді.Әлсіз негіз бола отырып, Зульбекс^® барлық дозаларында тез сіңеді және асқазанның париетальді жасушаларының қышқылды ортасында жинақталады. Зульбекс^® протондалу жолымен сульфенамидтік түрге конверсияланады, сосын протондық помпа цистеинінің қолжетімді молекулаларымен өзара әрекеттеседі.

Секрецияға қарсы әсері

Зульбекс^® 20 мг дозада ішу арқылы қабылдағаннан кейін секрецияға қарсы әсері 1 сағат ішінде дами бастайды, 2-4 сағаттан соң ең жоғарғысына жетеді. Базальді және тағаммен стимуляцияланған асқазандағы тұз қышқылының сөлінісі натрий рабепразолының бірінші дозасын қабылдағаннан кейін 23 сағаттан соң 69% және сәйкесінше 82% құрайды және 48 сағатқа дейін созылады. Натрий рабепразолының тұз қышқылының сөлінісіне қатысты тежегіштік әсері екінші дозаларын қабылдағанда біраз ұлғаяды, 3 күннен кейін тепе-теңдік жағдайына жетеді. Препаратты тоқтатқаннан кейін асқазанның секреторлық белсенділігі 2-3 күннен кейін қалпына келеді.

Плазмадағы сарысу гастринінің деңгейіне әсері

Зульбексті^® тәулігіне бір рет 10 мг немесе 20 мг дозада ұзақ уақыт (43 айға дейін) қабылдағанда, сарысудағы гастрин деңгейлері қабылдаудың бастапқы 2 - 8 аптасында, қышқыл сөлінісіне бәсеңдеткіш әсерін тигізе отырып артады, сосын емдеуді жалғастырғанда тұрақты болып қалады. Гастрин концентрацияларының көрсеткіштері әдетте, емдеуді тоқтатқаннан кейін 1-2 апта ішінде бастапқы мәніне қайтып келген.

Рабепразолды 8 аптаға дейін қабылдаған және 36 ай емделгендердің асқазанының антральді бөлігі мен түбінен алынған биопсиялық үлгілерден ECL-жасушалық және гистологиялық құрылымының, гастрит дәрежесінің, атрофиялық гастрит дамуының жиілігінің, интестинальді метаплазияда немесе H. Pylori инфекциясының таралуында өзгерістер анықталған жоқ.

Басқа әсерлері

Натрий рабепразолының ОЖЖ-ға, жүрек-қантамыр және тыныс алу жүйелеріне қатысты жүйелік әсерлері бүгінгі күні анықталған жоқ. Зульбексті^® 2 апта бойы 20 мг дозада ішу арқылы қабылдау қалқанша без қызметіне, көмірсу алмасуына немесе паратгормонның, кортизолдың, эстрогендердің, тестостеронның, пролактиннің, холецистокининнің, секретиннің, глюкагонның, фолликулостимуляциялаушы гормонның (ФСГ), лютеиндеуші гормонның (ЛГ), рениннің, альдостерон немесе соматотропты гормонның айналымдағы деңгейлеріне ықпалын тигізбейді.

Зульбекс^® амоксициллинмен клиникалық өзара әрекеттестікке түспейді және бұл препараттарды асқазан-ішек жолының үстіңгі бөліктеріндегі H. pylori эрадикациясы үшін бір мезгілде қабылдағанда амоксициллиннің немесе кларитромициннің плазмадағы концентрацияларына әсер етпейді.

Қолданылуы

- асқазан және он екі елі ішектің өршу сатысындағы ойық жаралы ауруында

• гастроэзофагеальді рефлюксті аурудың (ГЭРА) эрозивті немесе ойықжаралы түрлерінде
• гастроэзофагеальді рефлюксті ауруды (ГЭРА демеуші емі) ұзақ демеуші емдеуде
• гастроэзофагеальді рефлюксті ауруды орташадан ауыр дәрежесіне дейін симптоматикалық емдеуде (ГЭРА симптоматикалық емдеуде)
• Золлингер-Эллисон синдромында
• ойықжаралы ауруы бар пациенттерде Helicobacter pylori эрадикациясы үшін біріктірілген бактерияға қарсы ем құрамында

Қолдану тәсілі мен дозалары

Зульбекс^® таблеткаларын тұтастай жұту қажет; оларды шайнауға және сындыруға болмайды.

Ересектер/егде жастағы пациенттер

Асқазанның немесе 12 елі ішектің өршу сатысындағы ойық жаралы ауруы: Зульбекстің^® ұсынылатын дозасы тәулігіне бір рет, таңертең 20 мг құрайды.

Пациенттердің көпшілігінде 12 елі ішектің белсенді ойық жарасы төрт апта ішінде жазылады. Алайда, кейбір пациенттерге ойық жараның толық жазылуы үшін тағы 4 апта қажет болуы мүмкін. Асқазанның қатерлі емес белсенді ойық жарасы пациенттердің көпшілігінде алты апта ішінде жазылады. Алайда пациенттердің азғантай бөлігінде толық жазылуы үшін тағы алты апта қажет болуы мүмкін.

Эрозиялы-ойық жаралы немесе гастроэзофагеальді рефлюкстік ауру (ГЭРА): Зульбекстің ^®бұл жағдайда ішке қабылдауға ұсынылатын дозасы төрттен сегіз аптаға дейін тәулігіне бір рет 20 мг құрайды.

Гастроэзофагеальді рефлюкстік ауруды ұзақ уақыт емдеу (ГЭРА демеуші ем): Ұзақ уақыт емдегенде пациентті емдеуге реакциясына байланысты Зульбекстің^® тәулігіне бір рет 10 мг немесе 20 мг демеуші дозасы қолданылуы мүмкін.

Орташадан ауыр дәрежеге дейінгі гастроэзофагеальді рефлюкстік ауруды симптоматикалық емдеу (симптоматикалық ГЭРА): эзофагитпен ауырмайтын науқастарда тәулігіне бір рет 10 мг. Егер апта ішінде симптомдарын бақылауға алу мүмкін болмаса, пациентті қосымша тексеруден өткізу қажет. Жағдайы жақсарғаннан кейін симптомдарын ары қарай қадағалау қажеттілігіне қарай тәулігіне бір рет 10 мг қабылдау арқылы жүргізуге болады.

Золлингер-Эллисон синдромы немесе патологиялық гиперсекрециямен сипатталатын басқа жағдайлар: ересектер үшін ұсынылатын старттық дозасы тәулігіне бір рет 60 мг құрайды. Дозасын пациенттің жеке қажеттіліктеріне байланысты тәулігіне 120 мг дейін ұлғайтуға болады. 100 мг дейінгі тәуліктік дозасын бір рет қабылдау режимімен тағайындауға болады. 120 мг дозасы тәулігіне екі рет 60 мг-ден бөліпқабылдауды қажет етеді. Сәйкесінше клиникалық көрсеткіштер бар кезге дейін емдеу жалғаса береді.

H. pylori эрадикациясы: H. Pylori жұқтырған пациенттер эрадикациялық емдеуден өтуі тиіс. Препараттардың төмендегі біріктірілімі 7 күндік курспен ұсынылады.

Зульбекс^®тәулігіне екі рет 20 мг дозада + кларитромицин тәулігіне екі рет 500 мг дозада және амоксициллин тәулігіне екі рет 1 г.

Егер эрадикация сызбалары препаратты тәулігіне бір рет қабылдауды талап етсе, Зульбекс^® таблеткаларын таңертең, таңғы асты ішер алдында қабылдау қажет; бірақ тәулік мезгілі де, ас ішу де натрий рабепразолының сіңуіне әсер етпейді, препаратты қабылдаудың мұндай режимі емдеу режимінің жақсы сақталуына ықпал етеді.

Бауыр немесе бүйрек функциясының бұзылулары

Бауыры немесе бүйрегі ауыратын науқастарда дозасын түзету қажет емес.

Бауырдың ауыр жеткіліксіздігі бар пациенттерді емдеу сақтықпен жүргізілуі тиіс («Айрықша нұсқаулар» бөл.қар.).

Балалар

Зульбекс^® аталған жас тобында оны пайдалану тәжірибесінің жоқтығына байланысты балаларда қолдану үшін ұсынылмайды.

Жағымсыз әсерлері

Жиі (³1/100-ден <1/10 дейін):

• үйқысыздық
• бас ауыруы, бас айналуы
• жөтел, фарингит, ринит
• диарея, құсу, жүрек айнуы, іштің ауыруы, іштің қатуы, метеоризм
• спецификалық емес ауыру, арқаның ауыруы
• астения, тұмау тәрізді ауру

Жиі емес (³1/1,000-ден <1/100 дейін):

• күйгелектік
• ұйқышылдық
• бронхит, синусит
• диспепсия, ауыздың құрғауы, кекіру
• бөртпе, эритема
• миалгия, аяқтардың құрысуы, артралгия
• несеп жолының инфекциясы
• кеуденің ауыруы, қалтырау, температураның жоғарылауы
• бауыр ферменттері белсенділігінің артуы
• анорексия
• депрессия
• көрудің бұзылуы
• гастрит, стоматит, дәм сезудің өзгеруі
• гепатит, сары ауру, бауыр циррозымен науқастарда бауыр энцефалопатиясы
• қышыну, тершеңдік
• интерстициальді нефрит
• дене салмағының артуы

Сирек: (³1/10000-ден <1/1000 дейін):

- нейтропения, лейкопения, тромбоцитопения, лейкоцитоз

- жоғары сезімталдық реакциялары (беттің ісінуі, гипотензия, ентігу), эритема, буллёздік реакциялар, ол әдетте препаратты тоқтатқаннан кейін жоғалады

Өте сирек (<1/10000):

- мультиформалы эритема, уытты-эпидермальді некроз (УЭН), Стивен-Джонсон синдромы

Жиілігі белгісіз (қолда бар мәліметтер бойынша анықталмайды):

- гипонатриемия, гипомагниемия

- сананың шатасуы

- шеткері ісінулер

- гинекомастия

Қолдануға болмайтын жағдайлар

- рабепразолға немесе препараттың қосымша заттарына жоғары сезімталдық

- жүктілік және лактация кезеңі

- 18 жасқа дейінгі балалар мен жасөспірімдер (қауіпсіздігі мен тиімділігі анықталмаған)

Дәрілермен өзара әрекеттесуі

Натрий рабепразолы асқазандағы қышқыл сөлінісінің тұрақты және ұзақ бәсеңдеуін тудырады. Сіңуі pH деңгейімен байланысты препараттармен өзара әрекеттесуі туындауы мүмкін. Натрий рабепразолын кетоконазолмен немесе итраконазолмен бір мезгілде қабылдау плазмадағы зеңге қарсы концентрациялардың айтарлықтай төмендеуіне алып келуі мүмкін. Сондықтан жекелеген пациенттерге Зульбекс^® пен бұл препараттарды бір мезгілде тағайындағанда дозасын өзгерту қажет болуы мүмкіндігін қадағалау керек.

Антацидтерді рабепразолмен бір уақытта қолданғанда өзара әрекеттесулер анықталмады.

300 мг атазанавир/10 мг ритонавир және омепразолды (тәулігіне бір рет 40 мг) немесе 400 мг атазанавир және ланзопразолды (тәулігіне бір рет 60 мг) бір мезгілде қабылдау атазанавир әсерінің едәуір азаюына әкеледі. Атазанавирдің сіңуі pH деңгейіне байланысты. Бұл препараттарды рабепразолмен бір уақытта қабылдау зерттелмегенмен, басқа протондық помпа тежегіштері үшін де ұқсас нәтижелер болжануы мүмкін. Сондықтанрабепразолды қоса алғанда, протондық помпа тежегіштерін, атазановирмен бір мезгілде қолданбаған жөн.

Айрықша нұсқаулар

Рабепразолмен емдеу аясындағы симптомдар айқындығының азаюы асқазанда немесе өңеште қатерлі түзілімдердіңболуын жоққа шығармайды, сондықтан Зульбекспен^® емдеуді бастар алдында онкологиялық үдерістерді жоққа шығару мақсатында зерттеу жүргізу керек.

Препаратпен ұзақ емделетін пациенттер (әсіресе бір жылдан артық) ұдайы тексеруден өтіп отыруы тиіс.

Протондық помпаның басқа тежегіштерімен немесе орынбасқан бензоимидазолдармен айқаспалы реакциялар қаупін жоққа шығаруға болмайды.

Пациенттерге Зульбекс^® таблеткаларын тұтастай жұту қажеттігін ескерту керек; оларды шайнауға және сындыруға болмайды.

Зульбексті^® балаларға тағайындау ұсынылмайды, өйткені препаратты пациенттердің бұл тобында қолдану тәжірибесі жоқ.

Рабепразолды қолданғанда қан дискразиясының (тромбоцитопения және нейтропения жағдайлары) дамуы, бауыр ферменттері белсенділігінің өзгеруі туралы хабарламалар болды. Көпшілік жағдайларда, бұл жағдайлардың баламалы себептерін анықтау мүмкін болмаса, олар асқынулар тудырған жоқ және рабепразолды тоқтатқаннан кейін басылды.

Бауыр функциясының жеңіл және орташа дәрежедегі бұзылуы бар пациенттерде препаратты қолданудың қауіпсіздігіне байланысты елеулі қиындықтар білінген жоқ. Бауыр функциясының ауыр бұзылуы бар пациенттерде Зульбексті^® бірінші рет тағайындағанда сақтық шараларын сақтау ұсынылады, өйткені мұндай пациенттерде рабепразолды қолдану туралы деректер жоқ.

Атазанавир мен Зульбексті^® бір мезгілде қабылдау ұсынылмайды («Дәрілермен өзара әрекеттесуі» бөл.қар.).

Жүктілік және лактация кезеңі

Рабепразолды жүктілік және лактация уақытында қолдану қауіпсіздігі бойынша деректер жоқ.

Дәрілік заттың көлік құралдарын немесе қауіпті механизмдерді басқару қабілетіне ықпал ету ерекшеліктері

Әсері туралы хабарланған жоқ, бірақ болуы мүмкін жағымсыз әсерлері – бас ауыруы, бас айналуын ескере отырып, зейін қоюды қажет ететін жұмыстарды орындағанда сақ болу керек.

Артық дозалануы

Препараттың ең жағарғы анықталған қабылданған мөлшері тәулігіне екі рет 60 мг немесе тәулігіне бір рет 160 мг асқан жоқ. Әсерлері әлсіз анықталады, қандай-да бір қосымша медициналық араласуларсыз өздігінен өтетін, жағымсыз реакциялардың белгілі бейініне сәйкес келеді.

Емі: спецификалық антидоты жоқ. Препаратта плазма ақуыздарымен байланысудың жоғарғы деңгейі бар, сондықтан диализдің көмегімен жою мүмкін емес. Артық дозалану жағдайында симптоматикалық және демеуші ем жүргізу қажет.

Шығарылу түрі мен қаптамасы

14 немесе 15 таблеткадан ламинацияланған полиамид/алюминий/поливинилхлорид үлбірден және алюминий фольгадан жасалған пішінді ұяшықты қаптамаға салынады.

1 (14 таблеткадан) немесе 2 (15 таблеткадан) пішінді ұяшықты қаптамадан мемлекеттік және орыс тілдеріндегі медициналық қолдану жөніндегі нұсқаулықпен бірге картоннан жасалған қорапшаға салынады.

Сақтау шарттары

Түпнұсқалық қаптамасында 30 ºС-ден аспайтын температурада, жарықтан қорғалған жерде сақтау керек.

Балалардың қолы жетпейтін жерде сақтау керек!

Сақтау мерзімі

2 жыл

Жарамдылық мерзімі өткеннен кейін пайдалануға болмайды.

Дәріханалардан босатылу шарттары

Рецепт арқылы

Өндіруші

КРКА, д.д. Ново место, Словения

Шмарьешка цеста 6, 8501 Ново место, Словения

Тіркеу куәлігі иесі

КРКА, д.д., Ново Место, Словения

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы:

«КРКА Казахстан» ЖШС, ҚР, 050059, Алматы қ-сы, Әл-Фараби даңғылы 19, 1б корпус, 2 қабат, 207 кеңсе

тел.: +7 (727) 311 08 09

факс: +7 (727) 311 08 12

info.kz@krka.biz