Сипаттама
Дәрілік затты медициналық қолдану жөніндегі нұсқаулық
Дексерил®
Саудалық атауы
Дексерил®
Халықаралық патенттелмеген атауы
Жоқ
Дәрілік түрі
Сыртқа қолдануға арналған крем
Құрамы
100 г препараттың құрамында:
белсенді заттар: 15.00 г глицерин,
8.00 г ақ жұмсақ парафин,
2.00 г сұйық парафин,
| қосымша заттар: стеарин қышқылы, глицерин моностеараты,полидиметилциклосилоксан, диметикон, макрогол 600, троламин, пропилпарагидроксибензоат, тазартылған су. | |
Сипаттамасы
Өзіне тән иісі бар, тегіс ақ крем.
Фармакотерапиялық тобы
Дерматология. Дерматопротекторлар. Жұмсақ парафинді және майлы өнімдер.
АТХ коды D02AС
Фармакологиялық қасиеттері
Фармакокинетикасы
Қатысы жоқ.
Фармакодинамикасы
Дексерил® препаратының теріні шамадан тыс құрғағанда жұмсартатын және ылғалдандыратын әсері бар.
Препараттың әсер ету механизмдері мынадай:
- судың трансэпидермалық жоғалуын төмендету: вазелин мен парафин мүйізгек қабаттан судың жоғалуын болдырмайтын және ондағы суда еритін және гигроскопиялық заттарды ұстап тұратын липид қабатын түзеді.
- глицериннің гигроскопиялық қасиеттеріне және оның эпидермиске өтетініне орай тері беткейінің қабаттарын жоғары ылғалдандыру.
Қолданылуы
- атопиялық дерматит, ихтиоз және псориаз сияқты дерматоздардың белгілі бір типтерінде терінің құрғауын қосымша емдеу
- тері жабынының аздаған аумағын қамтыған беткейлік күйіктерді қосымша емдеу
Қолдану тәсілі және дозалары
Сыртқа қолдануға арналған.
Ересектерге және сәбилерді қоса, балаларға кремнің жұқа қабаты терінің зақымданған бөліктеріне тәулігіне 1-2 рет немесе, егер бұл қажет болса, одан жиірек жағылады.
Жағымсыз әсерлері
Жиі емес ( ≥1/1,000-нан <1/100 дейін)
- есекжем, дерматит, экзема, эритема, қышыма, бөртпе
- қолданылған жердегі реакциялар (қолданылған жердегі тітіркену, қызару, ауыру немесе қышыну)
- тері күйігін сезіну
- қолданылған жердегі экзема
- терінің аллергиялық реакциялары
Жиілігі белгісіз
Күдік тудыратын жағымсыз реакциялар туралы есептілік
Дәрілік затты тіркеуден кейінгі күдік тудыратын жағымсыз реакциялар туралы есептіліктің зор маңызы бар және дәрілік заттың пайда/қауіп арақатынасына мониторинг өткізуді жалғастыру мүмкіндігін береді. Денсаулық сақтау қызметкерлерінен және тұтынушылардан ұлттық есептілік жүйесі арқылы кез келген күдікті жағымсыз реакциялар туралы хабарлауды өтінеді.
Қолдануға болмайтын жағдайлар
- препараттың қандай да бір компонентіне жоғары сезімталдық
Дәрілермен өзара әрекеттесуі
Басқа дәрілік заттармен өзара әрекеттесуіне зерттеулер жүргізілмеген.
Айрықша нұсқаулар
Жұтуға болмайды.
Инфекция түскен жарақатқа немесе окклюзиялық таңғыштың астынан жағуға болмайды.
Препараттың құрамында пропилпарагидроксибензоат бар және ол терінің аллергиялық реакцияларын (кейін білінуі мүмкін) туғызуы мүмкін.
Педиатрияда қолданылуы
Айрықша нұсқаулары ересектер үшін де балалар үшін де бірдей.
Жүктілік, фертильділік және лактация кезеңі
Жүктілік
Дексерил® препаратын жүкті әйелдерде пайдалануға болады, өйткені глицериннің, ақ жұмсақ парафиннің, сұйық парафиннің, препараттың жүйелік әсері мардымсыз.
Лактация кезеңі
Дексерил® препаратын лактация кезеңінде пайдалануға болады, бірақ препаратты бала емізу кезеңінде емшек терісіне қолдану ұсынылмайды.
Фертильділік
Препарат фертильділікке әсер етпейді, өйткені препараттың белсенді компоненттерінің жүйелі әсері мардымсыз.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Препарат механизмдерді жүргізу және басқару қабілетіне әсер етпейді немесе әлсіз әсер етеді.
Артық дозалануы
Артық дозалану жағдайлары жөнінде хабарланбаған.
Шығарылу түрі және қаптамасы
Ақ пропилен қалпақшамен жабылған тығыздығы төмен ақ полиэтилен сықпаларға 50 г немесе 250 г препарат салынған.
Медициналық қолдану жөніндегі мемлекеттік және орыс тілдеріндегі нұсқаулықпен бірге 1 сықпа картон қорапшаға салынады.
Сақтау шарттары
25°С-ден аспайтын температурада сақтау керек.
Балалардың қолы жетпейтін жерде сақтау керек!
Сақтау мерзімі
3 жыл
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецептісіз
Өндіруші
Пьер Фабр Медикамент Продакшн,
Etablissement Progipharm - Rue du Lycée – 45500, Жьен, Франция
Тіркеу куәлігінің ұстаушысы
Пьер Фабр Медикамент Продакшн, Булонь, Франция
Қазақстан Республикасы аумағында тұтынушылардан дәрілік заттардың сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):
«ВИВА ФАРМ» ЖШС, Қазақстан, 050030, Алматы, Дегдар к-сі, 33
тел.: +7 727 383 74 63, факс: +7 727 383 74 56; E-mail: рv@vivapharm.kz
