Сипаттама
Дәрілік затты медициналық
қолдану жөніндегі нұсқаулық
ДУОПРОСТ
Саудалық атауы
Дуопрост
Халықаралық патенттелмеген атауы
Жоқ
Дәрілік түрі
Көзге тамызатын дәрі, 2.5 мл
Құрамы
1 мл препараттың құрамында
белсенді заттар: латанопрост 0.05 мг, тимолол малеаты (тимололға шаққанда) 6.83 мг (5.00 мг);
қосымша заттар: динатрий фосфат додекагидраты, натрий дигидрофосфат дигидраты, натрий хлориді, бензалконий хлориді, 1M натрий гидроксиді ерітіндісі немесе 1 М хлорсутек қышқылы, тазартылған су.
Сипаттамасы
Механикалық қосылыстарсыз мөлдір түссіз сұйықтық.
Фармакотерапиялық тобы
Көз ауруларын емдеуге арналған препараттар. Глаукомаға қарсы препараттар және миотиктер. Бета-адреноблокаторлар. Басқа препараттармен біріктірілген тимолол.
АТХ коды S01ЕD51
Фармакологиялық қасиеттері
Фармакокинетикасы
Латанопрост пен тимолол малеаты арасындағы фармакокинетикалық өзара әрекеттесулер анықталмаған, біріктірілген препаратты қолданудан кейін 1-4 сағаттан соң сулы ылғалда латанопрост қышқылы концентрациясы монотерапия кезіндегіден шамамен екі есе жоғары болды.
Латанопрост
Латанопрост мөлдір қабық арқылы сіңеді, оның гидролизденуі эстеразалар әсерімен биологиялық белсенді қышқылға дейін жүреді. Латанопрост қышқылы сулы ылғалда алғашқы 4 сағат ішінде, ал қан плазмасында жергілікті қолданудан кейін алғашқы сағат ішінде анықталады.
Латанопростың ең жоғары концентрациясына (шамамен 15-30 нг/мл) сулы ылғалда жергілікті қолданғаннан кейін 2 сағ соң жетеді. Көзге тамызатын дәрі түрінде қолданғаннан кейін латанопрост бірінші кезекте алдыңғы сегментте, конъюнктивада және қабақта таралады және препараттың тек елеусіз мөлшері артқы сегментке жетеді.
Жүйелі қан ағымына түсетін латанопрост қышқылы, негізінен, бауырда май қышқылдарының бета-тотығуы арқылы метаболизденіп, 1,2-динор- және 1,2,3,4-тетранор-метаболиттерін түзеді, олардың биологиялық белсенділігі болмайды немесе әлсіз болады. Метаболиттер, негізінен, несеппен (енгізілген дозаның 88 %) шығарылады.
Плазмадан жартылай шығарылу кезеңі (t1/2) 17 мин құрайды. Қышқыл түріндегі латанопрост биожетімділігі 45 % құрайды.
Тимолол малеаты
Жергілікті қолданғанда тимолол малеаты мөлдір қабық арқылы жылдам өтеді. Көзге тамызатын дәріні тамызғаннан кейін көздің сулы ылғалында тимололдың ең жоғары концентрациясына 1 сағаттан соң жетеді. Доза бөлігі жүйелі сіңеді және қан плазмасында 1 нг/мл құрайтын ең жоғары концентрациясына күніне бір рет (300 мкг/күн) әр көзге бір тамшыдан жергілікті енгізуден кейін 10-20 минут өткенде жетеді. Тимолол малеаты елеусіз мөлшерде коньюнктива, мұрын шырышы және көз жасы жолының тамырлары арқылы сіңірілу жолымен жүйелік қан ағымына түседі. Тимолол метаболиттері көбіне бүйрек арқылы – несеппен шығарылады.
Плазмадан жартылай шығарылу кезеңі (t1/2) 6 сағ жуықты құрайды.
Фармакодинамикасы
Препарат құрамына екі белсенді компонент – латанопрост және тимолол малеаты кіреді. Жоғары көз ішіндегі қысымды (КІҚ) төмендету механизмі әртүрлі, бұл осы компоненттердің әрқайсысысын қолдану әсерімен салыстырғанда, КІҚ қосымша төмендеуін қамтамасыз етеді.
Латанопрост - простагландин F2α аналогы, простаноид FP рецепторларының іріктелген агонисі болып табылады. Латанопрост сулы ылғалдан көп ағып шығу жолымен, ең алдымен, увеосклералық жолмен, сондай-ақ трабекулярлық желі арқылы КІҚ төмендетеді. Сулы ылғал өндірілуіне және гематоофтальмологиялық бөгетке елеулі ықпалын тигізбейді.
Қысқа мерзімді емдеу кезінде, латанопрост адамдағы псевдофакия кезінде флюоресцинді көздің артқы сегментіне өткізбейді және емдік дозаларда қолданылғанда жүрек-қантамыр және тыныс алу жүйелеріне елеулі фармакологиялық әсер етпейді.
Тимолол – елеулі ішкі симпатомиметикалық белсенділігі жоқ, миокардқа тікелей депрессиялық ықпалын және жергілікті жансыздандыратын (жарғақша тұрақтандыратын) әсерін көрсетпейтін іріктелмеген β-1- және β-2 адреноблокатор.
Көзге тамызатын дәрі түрінде тимолол малеатын қолдану, глаукоманың болуына немесе болмауына қарамастан, жоғары және қалыпты КІҚ төмендеуін туындатады. Тимолол малеатының әсер етуімен КІҚ төмендетудің нақты механизмі анықталмаған - негізгі әсер ету механизмі сулы ылғал түзілуінің азаюымен байланысты болуы мүмкін. Алайда, кейбір зерттеулерде ағып шығудың аздап артуы да білінеді.
Латанопрост пен тимолол малеаты біріктірілімінің әсері бір сағат ішінде басталады, ал ең жоғары әсері 6-8 сағат ішінде байқалады.
Көп рет қолдану кезінде КІҚ талапқа сай төмендеуі енгізуден соң 24 сағат бойы сақталады.
Қолданылуы
- бета-блокаторлар немесе простагландиндер аналогтары тиімділігінің жеткіліксіздігі кезінде ашық бұрышты глаукомасы немесе жоғары офтальмотонусы бар пациенттерде жоғары көз ішіндегі қысымды (КІҚ) төмендетуде
Қолдану тәсілі және дозалары
Ересектерге (оның ішінде егде жастағы адамдарға) зақымданған көзге (көздеріне) тәулігіне бір рет бір тамшыдан.
Бір дозаны жіберіп алған жағдайда, келесі дозаны кестеге сәйкес қолданып емді жалғастыра беру керек. Зақымданған көзге тәулігіне бір тамшыдан артық тамызуға болмайды.
Дуопросты басқа офтальмологиялық препаратпен бірге қолданған жағдайда, кемінде 5 минут аралықпен қолдану керек.
Препаратты тамызар алдында жанаспалы линзаларды шешіп қойып, артынан 15 минут өткен соң тағу керек.
Мұрын-көз жасы өзегі жабылып қалғанда немесе қабақ 2 минутқа жабылған жағдайда жүйелі сіңуі төмендейді. Бұл жүйелі жағымсыз әсерлердің әлсіреуіне және жергілікті белсенділіктің жоғарылауына алып келуі мүмкін.
Жағымсыз әсерлері
Өте жиі (≥ 1/10):
- көз нұрлы қабығы пигментациясының күшеюі
Жиі (≥ 1/10, < 1/10):
- көздің тітіркенуі (оның ішінде шаншу, ашыту және қышыту), көздің ауыруы
Жиі емес (≥ 1/1000, < 1/100):
- көрудің бұзылуы, блефарит, катаракта, конъюнктивалық бұзылулар (фолликулдар, конъюнктивалық папиллярлы реакциялар, нүктелі қан құйылулар және т.б.), мөлдір қабықтың зақымдануы (эрозиялар, пигментация, нүктелі кератит және т.б.), рефракция бұзылулары, көз гиперемиясы, кератит, фотофобия, көру өрісінің тарылуы, бұлыңғыр көру, көз жасының көп ағуы
- бас ауыруы
- гипогликемия, гиперхолестеринемия
- гипертрихоз, бөртпе, терінің қышуы мен өзгеруі (тітіркену, дерматохалазион және т.б.)
Өте сирек (<1/10 000)
- препараттағы фосфаттарға байланысты мөлдір қабықтың кальцификациясы
Белгісіз
- синусит, жоғары тыныс алу жолдары бөлігінің инфекциялары және басқада инфекциялар
- депрессия
- гипертензия
- артрит
Латанопростқа тән:
- бас айналу
- көздің тітіркенуі (көздегі ашыту, көздің түйілуін сезіну, қышыну, шаншу және бөгде денені сезіну); эпителийдің өткінші нүктелі эрозиялары, қабақтың ісінуі, мөлдір қабықтың ісінуі мен эрозиясы; кірпіктердің және майда түктердің ұзаруы, жуандауы, санының көбеюі және пигментациясының күшеюі; ирит/увеит; макулярлы ісіну (афакиясы бар пациенттерде, жалған афакиясы және көз бұршағының артқы капсуласының жарылуы бар тұлғаларда немесе кистозды макулярлы ісінудің белгілі қауіп факторлары бар пациенттерде), соның ішінде цистоидты түрі; кейде көздің тітіркенуін тудыратын кірпіктердің өсу бағытының өзгеруі; көрудің бұлыңғырлануы, герпестік кератит, фотофобия, нұрлы қабық кистасы, қабақ әжімінің тереңдеуіне әкелетін периорбитальді аумақтағы және қабақ аумағындағы өзгерістер
- тері бөртпесі, қабақ терісінің қараюы және қабақтардағы жергілікті тері реакциялары
- ауруы бұрыннан бар пациенттерде стенокардияның өршуі, жүректің жиі соғуы
- демікпе (соның ішінде, анамнезінде бронх демікпесі бар пациенттердегі жедел ұстамалар немесе аурудың өршуі), ентігу
- буынның және бұлшықеттердің ауыруы
- кеуденің спецификалық емес ауырулары
Тимололға тән:
- жүйелі аллергиялық реакциялар белгілері мен симптомдары, соның ішінде анафилаксия, ангионевроздық ісіну, есекжем, оқшауланған және жайылған ісіну, қышыну, аллергиялық реакциялар
- анорексия, қант диабетімен науқастардағы гипогликемияның жасырын симптомдары
- мінез-құлық өзгерістері және психикалық бұзылыстар, соның ішінде сананың шатасуы, елестеулер, үрей, бағдардан жаңылу, күйгелектік, есте сақтай алмау, либидо төмендеуі, ұйқысыздық және түнгі қорқыныштар, жабығу
- ми ишемиясы, ми қан айналымының жедел бұзылулары, бас айналу, myasthenia gravis симптомдарының күшеюі, парестезия, ұйқышылдық, естен тану, бас ауыру
- цистоидты макулярлы ісіну, эрозия және мөлдір қабық сезімталдығының төмендеуі; фильтрациялық хирургиялық араласулардан кейін тамыр қабығының ажырауы; птоз, көрудің нашарлауы, соның ішінде рефракция өзгеруі және диплопия, көздің құрғауы, блефарит, кератит, ашыту, шаншу, көзден жас ағу, анық көрмеу.
- құлақтағы шуыл
- брадикардия, аритмия, атриовентрикулярлы блокада, жүректің тоқтауы, іркілісті жүрек жеткіліксіздігі, жүректің соғуы, стенокардияның үдеуі
- артериялық гипотензия, Рейно синдромы, аяқ пен қолдың суынуы, мезгіл-мезгіл ақсаңдау
- бронх түйілуі (көбінесе бронх түйілу ауруларымен науқастарда), жөтел, ентігу, мұрынның бітелуі, өкпенің ісінуі және тыныс алу жолдарының жеткіліксіздігі
- жүрек айнуы, диарея, диспепсия, ауыздың кеберсуі, іштің ауыруы, құсу, дисгевзия, ретроперитонеальді фиброз
- алопеция, псевдопемфигоид, псориаз тәрізді бөртпе немесе псориаздың өршуі, тері бөртпесі
- жүйелі қызыл жегі
- астения, шаршау, кеуденің ауыруы, ісінулер
- бұлшықеттің ауыруы
- жыныстық дисфункция, либидо төмендеуі, импотенция, Пейрони ауруы
Қолдануға болмайтын жағдайлар
- латанопростқа, тимолол малеатына немесе басқада препараттың компоненттеріне жоғары сезімталдық
- әуe аурулары, бронх демікпесі, анамнездегі бронх демікпесін қосқанда, өкпенің ауыр ағымдағы созылмалы обструкциялық ауруы
- синустық брадикардия, синустық түйіннің әлсіздік синдромы, синоаурикулярлы блокада, қызмет етіп тұрған электрокардиостимулятордың болмауынан II-III дәрежедегі атриовентрикулярлы бөгеліс, клиникалық айқын жүрек жеткіліксіздігі, кардиогенді шок
- жүктілік және лактация кезеңі
- балаларға және 18 жасқа дейінгі жасөспірімдерге
Сақтықпен
Қабыну, неоваскулярлы, жабық бұрышты немесе туа біткен глаукома, псевдофакиямен біріккен ашық бұрышты глаукома, пигментті глаукома (препаратты қолданудың жеткілікті тәжірибесінің болмауына орай); афакия, көз бұршағының артқы капсуласының жарылуымен болатын жалған афакия, макулярлы ісінудің белгілі қауіп факторлары бар пациенттер (латанопростпен емделгенде макулярлы, соның ішінде цистоидты ісіну жағдайлары сипатталған).
Дәрілермен өзара әрекеттесуі
Дуопрост препаратын бета-адреноблокаторларды ішке қабылдайтын пациенттерге қолданғанда КІҚ айқынырақ төмендеуі немесе бета-адреноблокаторлардың жүйелі көріністерінің күшеюі мүмкін, сондықтан екі және одан көп бета-адреноблокаторларды бір мезгілде жергілікті қолдану ұсынылмайды.
Простагландиндердің екі аналогын бір мезгілде көзге тамызғанда КІҚ парадоксты көтерілуі cипатталған, сондықтан екі және одан көп простагландиндерді, олардың аналогтарын немесе туындыларын бір мезгілде қолдану ұсынылмайды. Тимолол малеатын адреналинмен (эпинефринмен) бір мезгілде қолданғанда кейде мидриаз дамыған.
Тимолол малеатын төменде тізбеленген препараттармен біріктіргенде жүйелі гипотензияның және/немесе айқын брадикардияның дамуымен аддитивті әсері болуы мүмкін:
• кальций өзекшелерінің блокаторлары;
• катехоламиндер деңгейінің төмендеуін туындататын дәрілер немесе бета-адреноблокаторлар;
• аритмияға қарсы дәрілер (амиодаронды қоса);
• парасимпатомиметикалық дәрілермен;
• симпатолитикалық дәрілермен (гуанетидинді қоса);
• жүрек гликозидтері.
Бета-адреноблокаторлар диабетке қарсы дәрілердің гипогликемиялық әсерін күшейтуі мүмкін.
CYP2D6 цитохромы тежегіштерімен (хинидин, флуоксетин, пароксетинді қоса) және тимололмен біріктірілген ем кезінде бета-адренергиялық рецепторлардың жүйелі бөгелісінің күшеюі (жүректің жиырылу жиілігінің төмендеуі, депрессиялар) хабарланған.
Бета-адреноблокаторлар қабылдау кезінде клонидинді күрт тоқтатудан болатын гипертензиялық реакция күшеюі мүмкін.
Айрықша нұсқаулар
Дуопрост құрамында бензалконий хлориді бар, ол әдетте офтальмологиялық препараттарда консервант ретінде пайдаланылады.
Бензалконий хлоридінің нүктелі кератопатияның және/немесе уытты ойық жаралы кератопатияның тудырушысы болып табылатыны бәріне белгілі, көз тітіркенуін туындатуы мүмкін, белгілі болғандай, жұмсақ жанаспалы линзаны түссіздендіреді. Сондықтан жанаспалы линзаны шешу керек, тамызғаннан кейін 15 минуттан соң оларды орнына қайта тағуға болады.
Латанопрост
Емдеуді тағайындар алдында пациентті көздің түсі өзгеруі мүмкіндігінен хабардар ету керек. Латанопрост нұрлы қабықтағы қоңыр пигменттің мөлшерінің біртіндеп артуын туындатуы мүмкін. Көз түсінің өзгеруі нұрлы қабықтың стромальді меланоциттерінде меланиннің мөлшерінің артуынан болады. Осындай жағдайларда қоңыр пигментация қарашық айналасында пайда болады және нұрлы қабықтың шетіне жайылады. Мұндайда бүкіл нұрлы қабық немесе оның бөліктері қоңыр түске боялады. Көп жағдайларда түсінің өзгеруі мардымсыз болады және клиникалық тұрғыдан анықталмауы мүмкін. Бір немесе екі көздің де нұрлы қабығы пигментациясының күшеюі, негізінен, нұрлы қабықтың қоңыр түсінің негізінде аралас түске ие болатын пациенттерде байқалады.
Нұрлы қабық пигментациясының дәрежесін 5 жылдан астам уақыт бойы анықтаған кезде, тіпті латанопростпен емдеуді жалғастырған кезде де, пигментацияның күшеюінің жағымсыз салдарлары анықталмаған. Пациенттерде КІҚ төмендеу дәрежесі нұрлы қабық пигментациясының күшейгенініне немесе күшеймегеніне байланыссыз бірдей болды. Демек, латанопростпен емдеуді нұрлы қабық пигментациясы күшейген жағдайда да жалғастыруға болады. Мұндай пациенттер ұдайы бақылауда болуға тиіс, және де клиникалық жағдайларға байланысты, емдеу тоқтатылуы мүмкін.
Нұрлы қабықтың пигментациясының күшеюі әдетте емдеуді бастағаннан кейін алғашқы жыл ішінде, сирек жағдайда – екінші немесе үшінші жылы байқалады. Пигментацияның өршу жылдамдығы уақыт өте келе төмендейді және 5 жылдан кейін тұрақталады. Емдеуді тоқтатқаннан кейін нұрлы қабықтың қоңыр пиментациясы күшейгені анықталмады, алайда көздің түсінің өзгеруі қайтымсыз болуы мүмкін.
Латанопростты қолдануға байланысты қабақтың терісінің қараю жағдайлары болғаны айтылған, ол қайтымды болуы мүмкін.
Латанопрост кірпіктердің және майда түктердің біртіндеген, мысалы ұзартуы, қалыңдатуы, пигментациясын күшейтуі, қалыңдығын арттыруы және кірпіктердің өсу бағытын өзгеруі сияқты өзгерісін туындатуы мүмкін. Кірпіктердің өзгеруі қайтымды және емдеуді тоқтатқаннан кейін кетеді.
Тамшыларды бір көзге ғана қолданатын пациенттерде гетерохромия дамуы мүмкін.
Анамнезінде герпестік кератиті бар пациенттерге латанопросты сақтықпен қолдану керек. Қарапайым герпес туындатқан белсенді кератит жағдайында, сондай-ақ анамнезінде, әсіресе простагландиндердің аналогтарынан туындаған қайталанған герпестік кератиті бар пациенттерге латанопростты қолдануға болмайды.
Латанопростпен емдеген кезде макулярлы ісіну, оның ішінде кистозды макулярлы ісіну жағдайлары туралы хабарлар болған. Бұл құбылыстар ең алдымен афакиясы бар пациенттерде, псевдоафакиясы және көз бұршағының артқы капсуласы үзілген адамдарда немесе кистозды макулярлық ісіну қаупінің белгілі факторлары бар пациенттерде пайда болған. Осыған байланысты Дуопрост препараты бұндай пациенттерде сақтықпен қолданылуы тиіс.
Псевдофакиялық көз және пигментті глаукомасы бар пациенттерде қабынған, неоваскулярлық немесе созылмалы жабықбұрышты глаукомада, ашықбұрышты глаукомада латанопростты қолдану туралы құжатты рәсімделген деректер жоқ.
Тимолол малеаты
Бета-адреноблокаторларды жергілікті қолданған кезде оларды жүйелік қолданған кездегі сияқты жағымсыз реакциялар байқалуы мүмкін. Анамнезінде жүректің ауыр аурулары бар пациенттер, жүрек жеткіліксіздігі симптомдарын дер кезінде анықтау үшін, ұдайы бақылауда болғаны жөн. Тимолол малеатын жергілікті қолданған кезде жүрек және тыныс алу жүйесі тарапынан келесі реакциялар пайда болуы мүмкін: ишемиялық жүрек ауруының үдеуі, Принцметал стенокардиясының өршуі, сондай-ақ шеткері (Рейно ауруының ауыр түрі немесе Рейно синдромы) және орталық циркуляторлы бұзылулар, гипотензия, жүрек жеткіліксіздігінің өліммен аяқталуы, тыныс алу жүйесі тарапынан ауыр реакциялар, оның ішінде демікпеге шалдыққан науқастарда өліммен аяқталған бронх түйілуі, брадикардия.
Жеңіл және орташа дәрежедегі ӨСОА бар пациенттерде сақтықпен және тек егер потенциалды пайдасы потенциалды қаупінен астам болса ғана қолдану керек. Тимолол малеатының бета-адреноблокаторлар импульсінің жүргізілу уақытына қолайсыз әсеріне байланысты бірінші дәрежедегі жүрек блокадасы бар пациенттерде сақтықпен қолдану керек.
Ауқымды хирургиялық араласым жүргізер алдында бета-адреноблокаторларды біртіндеп тоқтатудың пайдалылығын талқыға салған жөн. Осы топтың препараттары жүректің рефлекторлы бета-адренергиялық стимуляцияға жауап реакция беру қабілетін бұзады, ол жалпы наркоз кезінде қауіпті арттыруы мүмкін.
Бета-адреноблокаторлар диабетке қарсы дәрілердің гипогликемиялық әсерін күшейтуі және гипогликемия симптомдарын және біліністерін бүркемелеуі мүмкін. Оларды өздігінен болған гипогликемиясы бар немесе қант диабеті бар (әсіресе барысы құбылмалы), инсулин немесе қантты төмендететін пероральді дәрілерді қабылдап жүрген науқастарға абайлап қолданған жөн.
Бета-адреноблокаторлармен емдеу гипертиреоздың кейбір негізгі симптомдарын және біліністерін бүркемелеуі мүмкін. Емдеуді күрт тоқтату осы ауруды өршітуі мүмкін.
Бета-адреноблокаторлармен емдеген кезде атопиясы немесе анамнезінде әртүрлі аллергендерге ауыр анафилаксиялық реакциялары бар науқастарда осы аллергендермен қайтадан байланысқан кезде оның жауабы күшеюі мүмкін. Мұндайда анафилаксиялық реакцияларды басу үшін қолданылатын адреналиннің әдеттегі дозалары тиімсіз болуы мүмкін.
КІҚ-ды төмендететін дәрілерді қолданған кезде фильтрациялық емшаралардан кейін тамырлы қабықтың ажырағаны сипатталды.
Бета-адреноблокаторлар тобының офтальмологиялық препараттары көз құрғауын туындатуы мүмкін. Мөлдір қабық аурулары бар пациенттерде қолданғанда сақтық жасау керек.
Жүктілік және лактация кезеңі
Дуопрост препаратын өте қажет жағдайдан (анық көрсетіліммен және ана мен шаранаға пайда/қатер ара қатынасы талдамасы анық болғанда) басқа уақытта жүкті әйелдерде қолдануға ұсынылмайды.
Препарат сүтпен бөлінеді, сондықтан аналар препарат қолдану уақытында бала емізуді тоқтатуы керек.
Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері
Көзге тамызатын дәрілерді қолдану көрудің өткінші бұлыңғырлануын тудыруы мүмкін. Бұл әсері басылып болғанша, пациенттерге көлік құралын немесе қауіптілігі зор механизмдерді басқаруға болмайды.
Артық дозалануы
Адамдардың латанопростпен/тимололмен артық дозалануы туралы деректер жоқ.
Симптомдары: көздің тітіркенуі, конъюнктивальді немесе эписклеральді гиперемия – латанопростпен артық дозаланудың белгілері және бас айналуы, бас ауыруы, аритмия, брадикардия, бронх түйілуі, жүрек айнуы, құсу, шаршағыштық, қан кернеулері және тершеңдік – тимололмен артық дозаланудың белгілері.
Емі: симптоматикалық.
Шығарылу түрі мен қаптамасы
2.5 мл кем емес препараттан сыйымдылығы 5 мл, тамшылатқыш-тығынмен және сақтандырғыш сақинасы бар бұрандалы қақпақпен жабдықталған полиэтилен құтыда.
Құтыға заттаңба жапсырылады.
1 құтыдан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.
Сақтау шарттары
Жарықтан қорғалған жерде, 2С-ден 8С-ге дейінгі температурада.
Құтыны ашқаннан кейін 25С-ден аспайтын температурада.
Балалардың қолы жетпейтін жерде сақтау керек!
Сақтау мерзімі
3 жыл.
Құтыны ашқаннан кейін қолдану мерзімін 4 аптадан асыруға болмайды.
Жарамдылық мерзімі өткеннен кейін қолдануға болмайды.
Дәріханалардан босатылу шарттары
Рецепт арқылы
Өндіруші/Қаптаушы
К.О. Ромфарм Компани С.Р.Л., Отопень қ., Ероилор к-сі, № 1А, Румыния
тел. +4021 350 46 40, факс: +4021 350 46 41
Тіркеу куәлігінің иесі
К.О. Ромфарм Компани С.Р.Л., Отопень қ., Румыния
Қазақстан Республикасы аумағында тұтынушылардан дәрілік заттың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы
«ROMPHARM COMPANY» S.R.L. («РОМФАРМ КОМПАНИ» С.Р.Л.) Қазақстан Республикасындағы өкілдігі,
050013, Алматы қ., Бұхар жырау бульвары, 33 үй, «Жеңіс» БО, 41 кеңсе,
телефон: 8 (727) 247-07-85, факс: 8 (727) 376-35-88,
электрондық пошта: amangul-62@mail.ru
