Триовит №30, капс.

Сипаттама

Дәрілік затты медициналық қолдану

жөніндегі нұсқаулық

Триовит^®

Саудалық атауы

Триовит^®

Халықаралық патенттелмеген атауы

Жоқ

Дәрілік түрі

Капсулалар

Құрамы

1 капсуланың құрамында

белсенді заттар – бетатаб 20% S – 50,0 мг (10,0 мг бета-каротинге баламалы), селеннің ашытқымен кешені 2000 – 25,0 мг (50,0 мкг селенге баламалы), аскорбин қышқылы – 100,0 мг, альфа-токоферол ацетаты 50%-80,0 мг (40,0 мг альфа-токоферол ацетатына баламалы),

қосымша заттар: сусыз коллоидты кремнийдің қостотығы, магний стеараты, тальк,

капсула қабығының құрамы: титанның қостотығы (Е171), хинолинді сары (Е104), азорубин (Е122), желатин

Сипаттамасы

Қатты желатин капсулалар №1 қызыл қошқыл түсті. Капсуланың ішінде – қызғылт-қоңыр, қоңыр және сарғыш-ақ түсті ұнтақтар қоспасы.

Фармакотерапиялық тобы

Минералды заттары бар поливитаминдер. Поливитаминдер минералдармен және олардың біріктірілімдерімен.

АТХ коды А11АА03.

Фармакологиялық қасиеттері

Фармакокинетикасы

Бета-каротин жіңішке ішектің шырышты қабығы арқылы сіңеді. Жіңішке ішекте каротеноид-диоксигеназа ферменті бета-каротиннің молекуласын тең екі бөлікке ыдыратады. Нәтижесінде альдегид түзіледі, содан кейін ол ретинолға (А₁ дәрумені) дейін тотығады.

Каротеноид-диоксигеназаның адамдағы белсенділігі онша емес; ішке қабылданған бета-каротиннің шамамен 50%-ы ретинолға ауысады. Бета-каротиннің бір бөлігі жіңішке ішекте сіңеді және өзгермеген күйде липопротеидтерге байланысты қанда тасымалданады. Ол барлық тіндер мен ағзаларда, атап айтқанда май тінінде және бауырда жинақталады, қажет болғанда сол жерден А дәруменіне конверсияланады.

Е дәрумені асқазан-ішек жолында сіңеді және лимфалық тамырлар арқылы жүйелі қан ағымына түседі, ол жерде плазманың бета-липопротеидтерімен байланысады. Ол барлық тіндерге енеді және тіндік депо түзеді. Ол май тінінде, бауырда және бұлшықеттерде жинақталады. Е дәрумені тапшы болғанда ол әуелі бауырдан, содан соң бұлшықеттерден және ең соңында – май тінінен босап шығады. Е дәруменінің шамамен 80%-ы өтпен бірге асқазан-ішек жолына шығарылады, ал қалған бөлігі – несеппен метаболиттер түрінде шығарылады.

С дәруменінің (аскорбин қышқылының) сіңуі ауыз қуысының шырышты қабығында басталады да, он екі елі ішекте және жіңішке ішекте жалғасады. Аскорбин қышқылы барлық тіндер мен жасушаларға таралады. Сіңу дәрежесі айтарлықтай және дозаға тәуелді. Адам организмінде аскорбин қышқылы дегидроаскорбин қышқылына дейін қайтымды тотығады. Ол ішінара оксалин қышқылына және аскорбат-2-сульфатқа дейін метаболизденеді, бұлар бүйрекпен шығарылады. Аскорбин қышқылының артық мөлшері өзгермеген күйде бүйрекпен шығарылады. Органикалық селен жіңішке ішекте жақсы сіңеді. Талшықтарға бай тағам оның сіңуін баяулатады, ал А, Е және С дәрумендері – бұл үдерісті жылдамдатады. Селен, негізінен, бұлшықет тінінде және бауырда жинақталады; көп мөлшері сонымен қатар бүйректен, ұйқы безінен және мидан табылады. Ұйқы безінен және бүйректен селен өте жылдам, ал ми тіндерінен – ең соңынан мобилизацияланады.

Фармакодинамикасы

Триовит^® құрамында антиоксидантты дәрумендер С мен Е және b-каротин (А провитамині), олигоэлемент селен бар.

С, Е дәрумендері және бета-каротин организмнің жасушалары мен тіндерін бос радикалдардың зақымдауынан қорғайды.

Бета-каротин организмде А дәруменін түзе отырып метаболизмге ұшырайды. А дәрумені көздің торлы қабығының қалыпты қызмет етуіне, тіндердің эпителизация үдерістеріне қатысады, шаш пен тырнақтың регенерация үдерістерін реттейді, сүйектердің өсуін реттейді.

Е дәрумені жасушалық жарғақшалардың липидтерінің асқын тотығуын тежейді. Гемнің және ақуыздардың синтезіне, тіндік тыныс алу үдерістеріне, дәнекер тіні талшықтарының, тамырлардың тегіс бұлшықеттерінің, асқорыту жолының, жасушааралық заттың қалыптасуына қатысады.

С дәрумені коллагеннің және тістер дентинінің синтезін белсенділендіреді, фолий қышқылының және Fe метаболизміне қатысады, стероидты гормондардың және катехоламиндердің синтезінде маңызды рөл атқарады, антиденелердің, интерферонның синтезін стимуляциялайды.

Селен тіндердің серпімділігін реттеуге қатысады, антиоксиданттық әсер көрсетеді, организмнің жасушалары мен тіндерін бос радикалдардан туындаған сыртқы ортаның жағымсыз факторларының әсерінен қорғап, олардың мезгілінен бұрын бұзылуының алдын алады.

Қолданылуы

• дәрумен - антиоксиданттардың және селеннің тапшылығы
• құнарсыз тамақтану және үйлесімсіз диета
• қарқынды физикалық және ақыл-ой жүктемелері
• зиянды өндірістік жағдайларда жұмыс істеу
• бос радикалдардың қалыптасуының артуы (шылым шегу, ашық күн сәулесі астында ұзақ болу және басқа радиация түрлері)
• қоршаған ортаның шектен тыс ластануының әсері (ірі қалаларда және өнеркәсіп орталықтарында тұру)
• шектен тыс физикалық стрестің және психикалық ширығудың әсері

Қолдану тәсілдері және дозалары

Ересектерге

Триовитті^® күніне 1 - 2 капсуладан тамақтан кейін, аздаған мөлшердегі сумен ұрттау арқылы қабылдаған жөн, өйткені асқазанда ауырлық сезімі және метеоризм болуы мүмкін. Емдеу курсы 2 ай.

Жағымсыз әсерлері

• сирек жағдайларда препараттың жекелеген компоненттеріне және капсула қабығының құрамына кіретін бояғыштарға аллергиялық реакциялар
• препаратты ашқарынға қабылдаған кезде құсу және асқазандағы ауырлық сезімі
• жүрек айну (үлкен дозаларды ұзақ уақыт пайдаланғанда (күніне 15 капсуладан артық))
• парагидроксибензоаттардан туындаған есекжем, жанаспалы дерматит, бронх түйілуі

• капсулаларда болатын β-каротин терінің сарғаюын және несеп түсінің өзгеруін тудыруы мүмкін, бұл құбылыстар қауіпсіз, препаратты тоқтатуды қажет етпейді және қабылдауды тоқтатқаннан кейін басылады.

Қолдануға болмайтын жағдайлар

• препараттың кез келген компонентіне жоғары сезімталдық
• А және Е гипервитаминозы
• балалар мен 18 жасқа дейінгі жасөспірімдер

Дәрілермен өзара әрекеттесуі

Е дәрумені, әдетте аспиринмен біріккенде қан кету қаупін жоғарылатуы мүмкін. Аскорбин қышқылы қандағы салицилаттардың, этинилэстрадиолдың, бензилпенициллиннің, тетрациклиннің концентрацияларын жоғарылатады.

Өте үлкен дозаларда С дәрумені варфариннің тиімділігін төмендетуі мүмкін.

Айрықша нұсқаулар

Препарат құрамында қант жоқ, сондықтан қант диабеті бар пациенттер ТРИОВИТ^® қабылдауына болады. Басқа дәрумендік, дәрумендік-минералдық препараттарды бір мезгілде қабылдаған кезде дәрігермен кеңесу қажет.

β-каротинді ұзақ уақыт қабылдаған кезде тері жабындарының сарыға боялуы мүмкін, ол қауіпті емес.ТРИОВИТ^® қабылдауды аз уақытқа тоқтатқан кезде терінің сарғайғаны басылады.

Басқа поливитаминдерді микроэлементтермен бір мезгілде қабылдау және ұсынылған тәуліктік дозаны арттыру ұсынылмайды.

Қосымша заттарға қатысты айрықша нұсқаулар

Триовит^® құрамында азорубин (Е122) және хинолинді сары (Е104) бар, олар аллергиялық реакциялар тудыруы мүмкін. Олар балалардың іс-әрекеті мен зейініне теріс ықпал етуі мүмкін.

Жүктілік және лактация кезеңі

Препаратты ұсыныс бойынша және дәрігердің бақылауымен қабылдаған жөн.

Дәрілік заттың көлік құралдарын немесе қауіптілігі зор механизмдерді басқару қабілетіне ықпал ету ерекшеліктері

Анықталмаған

Артық дозалануы

Симптомдары: жүрек айну, құсу, терінің және тырнақтардың сарғаюы (күніне 15 капсуладан артық қабылдағанда).

Емі: препаратты қабылдауды тоқтату. Симптоматикалық емдеу.

Шығарылу түрі және қаптамасы

10 капсуладан поливинилхлорид/поливинилдихлорид үлбірден және алюминий фольгадан жасалған пішінді ұяшықты қаптамаға салынған. 3 пішінді ұяшықты қаптамадан медициналық қолдану жөніндегі мемлекеттік және орыс тіліндегі нұсқаулықпен бірге картон қорапшаға салынады.

Сақтау шарттары

Түпнұсқалық қаптамасында, 25°С-ден аспайтын температурада, ылғалдан және жарықтан қорғалған жерде сақтау керек.

Балалардың қолы жетпейтін жерде сақтау керек!

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

­

Өндіруші

КРКА, д.д. Ново место, Словения

Шмарьешка 6, 8501 Ново место, Словения.

Тіркеу куәлігінің иесі

КРКА, д.д. Ново место, Словения

Қазақстан Республикасы аумағында тұтынушылардан өнім (тауар)сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның мекенжайы

«КРКА Қазақстан» ЖШС, ҚР, 050059, Алматы қ., әл-Фараби д-лы 19, 1б корпус, 2-ші қабат, 207-кеңсе

тел.: +7 (727) 311 08 09

факс: +7 (727) 311 08 12

info.kz@krka.biz