Зовиракс 5% 2 гр крем д/губ

Сипаттама

Дәрілік затты медициналық қолдану жөніндегі нұсқаулық

ЗОВИРАКС

Саудалық атауы

Зовиракс

Халықаралық патенттелмеген атауы

Ацикловир

Дәрілік түрі

Сыртқа қолдануға арналған 5 % крем

Құрамы

100 г крем құрамында

белсенді зат – 5,0 г ацикловир,

қосымша заттар: пропиленгликоль, ақ жұмсақ парафин, цетостеарил спирті, сұйық парафин, макрогол стеараты, глицерин моностеараты, полоксамер 407, диметикон 20, натрий лаурилсульфаты, тазартылған су.

Сипаттамасы

Бөгде бөлшектерден және кесектерден бос және көзге көрінетін қатпарланусыз ақ немесе ақ дерлік түсті бір текті крем.

Фармакотерапиялық тобы

Дерматология. Дерматологияда қолдануға арналған антибиотиктер және химиотерапиялық препараттар. Жергілікті қолдануға арналған химиотерапиялық препараттар. Вирусқа қарсы препараттар. Ацикловир.

АТХ коды D06BB03

Фармакологиялық қасиеттері

Фармакокинетикасы

Кремді қолдану кезінде жүйелік сіңуі – ең төмен.

Фармакодинамикасы

Зовиракс Herpes simplex 1 және 2 типтеріне қатысты белсенді. Вирус инфекциясын жұқтырған жасушаларда тимидинкиназа бірізді реакциялар қатарынан соң ацикловирді ацикловир трифосфатының белсенді түріне өзгертеді. Ацикловир трифосфаты вирустық ДНҚ-полимераза үшін тежегіш пен субстрат ретінде әсер етеді және қалыпты жасушалық үдерістерге ықпал етусіз әріқарай вирустық ДНҚ синтезін болдырмайды.

Қолданылуы

- Herpes simplex (herpes labialis) вирусы туғызған ерін және бет инфекциялары.

Қолдану тәсілі және дозалары

Тек сыртқа қолдануға арналған. Препаратты терінің зақымданған және онымен шектесетін бөліктеріне жұқа қабатпен күніне 5 рет жағу (түнгі уақытты қоспағанда әр 4 сағат сайын) ұсынылады. Емдеуді мүмкіндігінше ертерек, дұрысы бастапқы сатыларында (қышыну немесе қызару) бастау керек. Емдеуді кешірек сатыларда да (папула немесе везикула) бастауға болады.

Емдеу ұзақтығы 4 күннен кем емес. Жазылу болмаған жағдайда емдеуді 10 күнге дейін ұзартуға болады. Егер жазылу 10 күн ішінде басталмаған жағдайда дәрігерге қаралу керек.

Егер сіз қажетті дозаны жағуды ұмытып кетсеңіз, оны еске түсірген бойда жағыңыз.

Зақымданған бөліктерге қосымша инфекция жұқтырудан және инфекцияның таралуынан сақтану үшін кремді жағуға дейін және одан кейін қолды мұқият жуып, зақымданған бөліктерді қолмен немесе сүлгімен ысқыламау қажет.

Жағымсыз әсерлері

жиі емес (≥ 1/1000 және < 1/100)

- препарат жаққан бөліктердегі өткінші қызару және ашыту

- аздаған құрғау және қабыршақтану

- қышыну

сирек (≥ 1/10000 және < 1/1000)

- эритема

- препараттың қосымша компоненттеріне болатын реакциямен жиірек байланысты жанаспалы дерматит

өте сирек (< 1/10000)

- ангионевроздық ісінуді қоса, шұғыл типті аса жоғары сезімталдық реакциялары

Қолдануға болмайтын жағдайлар

- ацикловир, валацикловир, пропиленгликоль немесе препараттың басқа компоненттеріне жоғары сезімталдық.

Дәрілермен өзара әрекеттесуі

Анықталмаған. Препаратты қолданар алдында басқа препараттардың кез келгенін жүйелі қабылдайтын пациенттерге дәрігермен кеңесу қажет.

Айрықша нұсқаулар

Препаратты бет пен еріннің герпес вирусымен зақымданған бөліктеріне ғана жағу керек. Кремді ауыз қуысы мен көздің шырышты қабықтарына жағу ұсынылмайды. Генитальді герпесті, сондай-ақ кез келген басқа инфекцияларды емдеуге пайдалануға болмайды. Ерекше күшті қайталанатын ерін герпесі бар пациенттерге, сондай-ақ ерін немесе бет герпесінің барына күдік туындаған жағдайда дәрігерге қаралу қажет. Көзге тигізіп алудан сақтану керек. Крем көзге түсіп кеткен жағдайда жылы сумен мұқият жуып, қажет болса, дәрігерге қаралу қажет.

Иммунитеті әлсіреген пациенттерге (мысалы, сүйек кемігін трансплантациялаудан кейін немесе АИТВ инфекциясы бар болса) қолдану ұсынылмайды және кез келген инфекцияны емдеуге қатысты дәрігермен кеңесу керек.

Құрамында терінің тітіркенуін (пропиленгликоль) және жергілікті тері реакцияларын, мысалы, жанаспалы дерматит (цетил спирті) туғызуы мүмкін қосымша заттар бар.

Жүктілік және лактация кезеңі

Препаратты жүктілік және бала емізу кезеңінде қолданудың қауіпсіздігіне талапқа сай және қатаң бақыланатын клиникалық зерттеулер жүргізілмеген. Қолданылуы тек ана үшін болжанатын пайдасы ұрық пен сәбиге төнетін зор қауіптен артық болатын жағдайларда ғана көрсетілімді.

Педиатрияда қолдану

Балалар жасында қолданылуына шектеулер жоқ.

Дәрілік заттың көлік құралын немесе қауіптілігі зор механизмдерді басқару қабілетіне әсер ету ерекшеліктері

Автокөлік жүргізуге және механизмдермен жұмыс істеуге қойылған шектеулер жоқ.

Артық дозалануы

Кремнің едәуір мөлшерін жаққан немесе кездейсоқ жұтып қойған кездегі артық дозалануы анықталмаған. Артық дозалануынан күдіктенгенде дәрігерге қаралу қажет.

Шығарылу түрі және қаптамасы

Бұралатын қалпақшасы бар алюминий сықпаға 2 г препараттан салынады. Сықпа ұшының шетінде қорғағыш жарғақша бар.

Медициналық қолдану жөніндегі мемлекеттік және орыс тілдеріндегі нұсқаулықпен бірге 1 сықпадан картон қорапшаға салынған.

Сақтау шарттары

25^°С-ден аспайтын температурада сақтау керек.

Мұздатып қатыруға болмайды.

Балалардың қолы жетпейтін жерде сақтау керек.

Сақтау мерзімі

3 жыл

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші ұйымның атауы және елі

Glaxo Operations UK Ltd, Ұлыбритания

Тіркеу куәлігін ұстаушының атауы және елі

GlaxoSmithKline Consumer Healthcare (UK) Trading Ltd, Ұлыбритания

Қазақстан Республикасы аумағында тұтынушылардан дәрілік заттар сапасына қатысты шағымдар (ұсыныстар) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта):

ГСК КХ КАЗАХСТАН ЖШС

Алматы қ.,Манас к-сі, 32А.

тел. +7 (727) 2446999

факс +7(727) 2446997

kz.safety@gsk.com

Медициналық қолдану жөніндегі нұсқаулықтың соңғы нұсқасы www.dari.kz сайтында (Мемлекеттік тізілім → препараттарды іздеу)

Дәріханалар

Қалалар